صباح / مساء الخير
اسمي “باسم”، (الجنوبي) المدير الإقليمي لخريطة مصر، وعلشان متتخضش فمدير الدولة لا تعني شيئ أكثر من إمكانية التعديل على نطاق مصر كلها، لكن بنفس قواعد محرر الخرائط العادية
شغلي ذو صلة بتكنولوجيا المعلومات وتخصصي في المحتوى البصري للمعلومة… شاركت في مجتمع ويز من 2016، ومكنتش أعرف عنه حاجة نهائي قبلها… إنطباعي وقتها إنه برنامج قوي لكن له خريطة رديئة… ولأن ويز كان فيه إمكانية لتعديل الخرائط قلد أدعبس ورا الموضوع ده قبل ما أمسح الأبليكيشن… ومن وقتها إتشبكت الشبكة ومش عارف أقلع عن إدمانه
أول ما دخلت هنا في القسم الخاص بمصر، إكتشفت إن خريطة مصر دي كلها على بعضها، بناها بتاع 4 أفراد ولا واحد منهم مصري، وولا واحد منهم موجود حاليا… طبعا أنا ذهلت… ومازلت متذكر أول حاجة كتبتها وقتها…
ويبدو إن شكري للغائبين، وإللى شغلهم مازال بيتكلم عنهم، أثار إنتباه صناع ويز القدامى… فتداخلوا للرد عليا وأبدوا إستعدادهم لتقديم تسهيلات ليا قبل ميعادها الرسمي… وأنا بدوري رفضت وصممت أطلع السلم بالراحة على حسب ما أنا حابب (أي مساعدة حد بيقدمهالك بيكون ليها تمن من الإلتزامات اللى بصراحة بتهرب منها)
تقريبا محدش علمني حاجة (باستثناء إكسبيرت من فرنسا كان في ضهري لما بتزنق) بس الخلاصة إني قريت كتير وغلطت كتير وياما عكيت حاجات، وياما بذلت مجهود في حاجات ليها أثر سلبي معرفوش وييجي حد أعلى مني ينسف كل اللى تعبت فيه فلو ده حصل معاك إعرف إن كلنا لها
محرر الخرائط بالنسبة للناس القديمة (اللى أدعوك تكون منها لو إنت لسه جديد) هو بالنسبالنا مش مجرد أداة للتعديل على الخرائط… دي حاجة زي كتابة التاريخ بلغة مفهومة للقدامى… حاجة زي لوحة الشرف اللى بتسجل كل فسفوسة في أصغر حارة مين عملها ومين عدل عليها… الحاجات دي مهما الناس خدتها المشاغل ورحلت، تاريخها بيفضل قاعد يحكى عن شغلها…
محرر الخرائط عرفني بناس كتير (عمري ما قابلتهم) وقدرت أشوف فيه خبراتهم، وطرقهم الخاصة لحل المشكلات المتكررة… وإنت بنفسك لما تتقن اللغة دي هاتقولك حاجات عن شخصية كل واحد… فلان صبور ودقيق وبيضيع ساعات في حاجة صغننة… فلان مستعجل وعملي وكل تركيزه على الشغل بأسرع وسيلة… فلان فنان وبيركز على العنصر الجمالي… فلان متزن وبيحاول يراعي كذا حاجة مع بعض… إلخ… وبالتالي لو صادفك القدر إنك تقابل حد من دول وتتكلموا مع بعض، هاتكونوا عارفين حاجات كتير عن شخصيات بعض…
الموضوع ده مكتوب ليه؟ إيه الغرض من التعارف؟
الموضوع ده إستراحة إجتماعية للمحررين… واقعيا من 2019 الزميل شريف (تينو.تيكو) بذل مجهود غير معلن في إنشاء روابط حقيقية بين محررين الويز، وده إستكمال للشق الإجتماعي اللي بدأه شريف،، مش مطلوب أي حاجة ولا أي مؤهلات غير كونك حابب الإدمان ده، أو حابب تتعاطى مستقبلا
ببساطة هو محاولة مفتوحة لتوسيع دائرة التعارف بين المحررين، وبدل ما تبقى بلغة محرر الخرائط، هاتبقى بالبلدي الشعبي السلس، وبمعزل تام عن أي قواعد
انا مكارى باعدل فى الخرايط فى مصر من 2012 وانضميت للمنتدى هنا من اول 2013 مناطق كتير شاركت فى اضافتها يعنى لما حضرتك قولت ان معظم المناطق عملها اجانب شرختنى من حوايا :oops:
صباح الفل،
بص، علشان يبقى إنضمامك مضمون،، فانت ﻻزم تساعدني في إحباط “مكاري” بأي وسيلة :mrgreen:
ممكن مثلا تبتدي بحكاية تعرفك على مجتمع ويز، وأهم ذكرياتك… المهم تكتب كتير علشان “مكاري” يحصل له إحباط :mrgreen:
مرحبا
أول شيء يسعدني أشوف منتدى واز المصري منتعش وفيه أعضاء نشيطة. وأنا فرحان لك أخ بسام وأتمنى تكون خير صديق وداعم للمحررين،
شاركت اول مرة فخريطة مصر بعد ما رجعت من زيارة لمصر أواخر ٢٠١٧. بعد ما انتهت الثلاث شهور للتحديث طلبت AM فبعض المدن وساعدت قليلا فإنشاء بعض الطرقات.
للأسف توقفت عن التحديث بسبب بعض التعقيدات فمجتمع واز المغرب.
رجعت مؤخرا، وأنا مسرور و أتمنى لكم التوفيق
تمام موافق
انا انضممت لمجتمع ويز بقالي ثلاث سنين او اربعة
المجتمع عندنا ايامها كان خامل جداً وبمجرد دخلت وكنت فعال ومشارك شجع الجميع يشارك ويكونوا فعالين وكنت افتح مواضيع ؏ اي حاجة بسيطة محتاجة تعديل او تصليح
طبعا بديت في قريتي اللي كانت شوارعها غير موجودة لى الخريطة ودلوقتي حتى فيه بعض عنواين ومحلات
طبعا كانت جدا شيقة مسيرتي وخلال هذي الفترة استطعت اتقرب كثير من اشخاص داخل المجتمع واشخاص من الشركة
طبعا حاليا انا اصمم واعدل الخريطة بعدة دول عربية منها مصر السعودية وفلسطين وبعض دول الخليج القريبة من المملكة السعودية .
انا ايضا مترجم للعربية بمجتمع ترانزفيكس الخاص بترجمة جميع بيانات ويز سواءا للتطبيق او في المحرر او حتى في الموقع
انا مستخدم عادى لبرامج الملاحة مثل جوجل مابس و سايجك ونفلت سكني الى اكتوبر و شغال فى مدينة نصر و باخد الدايرى كلة كل يوم و علية ردارات كتيرة - قلت ادور علي برنامج يعرفني مكان الردارات - و لقيت رادار بوت بس مش مجاني - و قالولي علي ويز قلت اجربة بس لقيت فى اخطاء كتيرة فى الاتجاهات اثناء سيري بة و عرفت ان ممكن اعدل فى الخريطة و بالفعل عملت تغيير واحد ونجح
ياريت المساعدة فى التعديل علي الخريطة لاني لسة جديد فى الموضوع.
اعتذر عن الاطالة
مساء الفل، آخر كلام هنا من ٢٠٢١، مش عارف بعد ٣ سنين أنتوا لسه موجدين ولا ايه!
أنا أسمى خالد مهندس تكنولوجيا معلومات، من ساعة ما عرفت ويز وكل مرة ادخل أحس لأ لسه عليه بدرى فى مصر، لحد من قريب حد قالى إن ويز بقى شق آوى فى مصر
فدخلت ابص لقيت عظمة! وده طبعاً بسبب مجهوداتكم. أنا بحب ألعب واظبط واحنتف بس لقيت الموضوع صعب من الأبلكيشين، حتى لما تعوز تعدل حاجة زى سرعة ردار اتغيرت بتعمل شقلباظات، أتمنى التعديل يكون أسهل من كده فى المستقبل.
أتمنى تكونوا لسه موجودين واتعرف على الناس الحلوة إللى ساعدت فى العظمة دى!
تحياتى
مساء الورد يا خالد،
تصدق، أنا معرفش ومحاولتش أبدًا أعدل من الأبليكيشن… تقنيا عملية تحرير الخرائط ممتعة (وأسهل بكتير) على الشاشات الكبيرة من خلال محرر الخرائط.
محرر الخرائط ممكن توصله لو دخلت من بي.سي أو لابتوب على الرابط ده: waze.com/editor
أنا متأكد إنك لو جربته مرة ولا إتنين، هتصاب بإدمانه زي حالاتنا :mrgreen:
فلو ده حصل معاك إعرف إن كلنا لها